Makronun rəsmi görüşündən sonra bu fotoları yayıldı | Gülməli vəziyyət yarandı

Fransa Prezidenti Emmanuel Makron Braziliyada üçgünlük səfərdədir.

Ancaq dünya mediasının diqqətini ölkələrin ikitərəfli əlaqələrindən çox Makronun Latın Amerikası ölkəsinin Prezidenti Luiz İnasio Lula da Silva ilə qəribə fotoları çəkib. Onlar gah Amazon meşələrində əl-ələ şəkillər çəkdirib, gah da ağ köynəklər geyinərək romantik pozalarda kameraların önünə keçiblər.

Braziliya mediasında da bu hadisə “toy albomu” kimi qələmə verilərək lağ mövzusuna çevrilib.

Sosial media istifadəçiləri isə şəkillərdən posterlər hazırlayaraq fotomontajla Lula və Makronu "La La Land" melodramının baş qəhrəmanları kimi göstəriblər.

Bir çoxları isə rəylərində şəkillərə "Onlar Amazonda evlənməyi, Parisdə isə balayı keçirməyi düşünürlər", "Toydan sonrakı şəkilləri gözləyirik, maraqlı albom alınacaq" kimi şərhlər yazıblar.

Makronun rəylərə münasibəti isə daha çox gülüşə səbəb olub. O deyib ki, "Bəli, Fransa Braziliyanı, Braziliya da Fransanı sevir" və həmkarını da paylaşımında işarəliyib.