Müharibənin daha bir dəhşətli nəticəsi | Ukraynanı bundan sonra nə gözləyir?

Ukrayna demoqrafik fəlakət içərisindədir. Bu barədə “Der Spiegel” nəşri yazıb.

Qeyd olunur ki, hələ müharibədən əvvəl Ukraynada böhran olsa da, Rusiyanın hərbi müdaxiləsindən sonra vəziyyət faciəvi hal almağa başlayıb.

“Demək olar ki, yeddi milyon insan xaricə qaçdı”, – məlumatda bildirilir.

Məlumata görə, Rusiyanın 2022-ci ilin fevralında başlatdığı genişmiqyaslı müharibə demoqrafik böhranı fəlakətə çevirib:

“Ən azı beş milyon ukraynalı hazırda Rusiyanın işğalı altında yaşayır. Onminlərlə dinc sakin və 100 minə qədər hərbçi həlak olub. Əgər 1990-cı illərin əvvəllərində Ukraynada 51,5 milyon insan yaşayırdısa, hazırda Kiyevin nəzarətində olan ərazidə cəmi 29 milyon insan yaşayır”.

Bildirilir ki, bu tendensiya təkcə Ukraynaya aid deyil:

“Rusiya da oxşar problemlə üz-üzədir. Amma Rusiyanın əhalisi Ukraynadakından demək olar ki, dörd dəfə çoxdur”.

Vurğulanır ki, Ukraynadakı hazırkı tendensiyanın qarşısının alınması üçün insanlar geri qayıtmalıdırlar:

“Bunun baş verməsi üçün ilk növbədə müharibə bitməli, təhlükəsizliyə zəmanət verilməlidir. Əks halda, çətin ki, kimsə ölkəsinə qayıtsın. Əksinə, Ukraynadan gedənlərin sayı artacaq”.