NATO kütləvi dron hücumlarına çözüm tapa biləcək? | HƏRBİ XRONİKA

“Hərbi xronika” rubrikasında bu dəfə Rusiyanın Polşa hava məkanına göndərdiyi dronların yaratdığı böhran və bunun NATO-nun müdafiə qabiliyyətindəki boşluqları üzə çıxarması diqqətə çatdırılıb.

Bildirilib ki, sentyabrın 10-da Rusiya Polşa hava məkanına 19 dron göndərərək Alyansın müdafiə qabiliyyətindəki boşluqları açıq şəkildə nümayiş etdirib. Eyni gündə Ukraynaya yönəlmiş 400-dən çox dronun əksinə, bu hücum yalnız 19 dronla həm Polşanın, həm də NATO-nun nüfuzuna təsir göstərib.

Qeyd olunub ki, Polşanın Hava Hücumundan Müdafiə sistemləri və NATO müttəfiqlərinin müdaxiləsi nəticəsində yalnız 4 dron məhv edilib. Qalan 15 dron isə dərinliklərə nüfuz edərək potensial təhlükə yarada bilib.

Hücum zamanı Niderlandın “F-35” qırıcıları ucuz “Gerbera” dronlarını zərərsizləşdirmək üçün hər biri 2,8 milyon dollar dəyərində raketlərdən istifadə edib. Bu isə müdafiə vasitələrinin hücum vasitələrindən 280 dəfə baha başa gəlməsini ortaya qoyub.

Ekspertlər bildirirlər ki, NATO üzvü ölkələrin şərq cinahında Hava Hücumundan Müdafiə sistemlərinin inteqrasiyasının olmaması və siyasi amillər Alyansın cavab reaksiyalarını zəiflədir. Bu balanssızlıq ucuz dronlara qarşı bahalı müdafiə vasitələrinin iqtisadi səmərəsizliyini göstərir.

Ekspertlər vurğulayırlar ki, yalnız siyasi qətiyyət və strateji investisiyalar Alyansın kütləvi dron hücumlarına qarşı effektiv müdafiəsini təmin edə bilər.