Netanyahuya qarşı bu hərəkətlərinə görə həbs olundular | ABŞ-də qalmaqal

İsrailin Baş naziri Benyamin Netanyahu ABŞ-yə səfər edib. Bir sıra görüşlər keçirən hökumət rəhbəri Vaşinqtonda təşkil olunun iclasda da çıxış edib.

O, açıqlamasında ölkəsinin İranla mübarizə apardığını vurğulayıb. Netanyahu bununla yalnız İsraili yox, ABŞ-ni qoruduğunu da iddia edib.

Benyamin Netanyahu çıxışında həmçinin ABŞ Prezidenti Cozef Baydenə təşəkkür edib: “40 ildən artıqdır ki, Prezident Baydenlə bir-birimizi tanıyırıq. Mən ona İsraillə olan dərin dostluğuna və özünün də dediyi kimi qürurlu sionist olduğuna görə minnətdarlığımı bildirmək istəyirəm”.

Baş nazirin sözügedən görüşü bir sıra maraqlı məqamlarla da yadda qalıb. Netanyahunun uğursuz siyasətinin əlaməti olaraq Konqresdəki Demokratların əksəriyyəti Baş nazirdən öncə palatanı tərk edib.

Digər hadisə onun iclasdakı çıxışı ərəfəsində yaşanıb. Belə ki, toplantıda iştirak edən qonaqlardan 6-sı Netanyahunun nitqinə mane olduqlarına görə həbs edilib. Buna səbəb isə onların atəşkəsə və girovların qaytarılmasını nəzərdə tutan razılaşmanın imzalanmasına çağıran köynəkləri nümayiş etdirmələri olub. Sözügedən şəxslərin arasında bir nəfər Fələstin əsilli ABŞ-li deputat Rəşidə Tlaib də olub.

Nümayəndələr Palatasının keçmiş spikeri Nensi Pelosi isə İsrailin Baş naziri Benyamin Netanyahunun ABŞ Konqresindəki çıxışını kəskin tənqid edərək, bunu Nümayəndələr Palatasının tarixində “ən pis” çıxış adlandırıb.

Etirazlar bununla da yekunlaşmayıb. Kapitolidən kənarda da kifayət qədər gərgin bir vəziyyət hökm sürüb. Minlərlə etirazçı iclası boykot edərək əllərində atəşkəs şüarları ilə küçələrə axışıb. Netanyahu isə bütün bunların qarşısında iğtişaş iştirakçılarını “İranın faydalı axmaqları” adlandırıb.