Sui-qəsdə məruz qalan şəxslər kimdir? - Moskvada dəhşətli hadisə

Rusiyada yaşayış binasının qarşısında avtomobil partlayıb.

Bu barədə yerli mediada məlumat yayılıb.

Bildirilib ki, nəqliyyat vasitəsinə quraşdırılan partlayıcı qurğunun işə düşməsi səbəbindən kişi və onun həyat yoldaşı müxtəlif dərəcəli bədən xəsarətləri alıb. Yaxınlıqda olan daha beş avtomobilə də ciddi ziyan dəyib.

“Partlayış paytaxt Moskvada, Sinyavinskaya küçəsində baş verib. Hadisə nəticəsində qəlpə yaraları alan kişi və qadın dərhal xəstəxanaya yerləşdirilib", – deyə xəbərdə bildirilib.

Məlumat üçün bildirək ki, sosial şəbəkələrdə avtomobilə partlayıcı qurğunu yerləşdirən şəxsin görüntüləri də yayılıb. Belə ki, gecə saatlarında açıq rəngli sviter geyinmiş gənc avtomobilə yaxınlaşıb və sürücü oturacağının altına partlayıcı qurğu yerləşdirib. Sonra isə qaçıb. Məhz bu səbəbdən də hüquq-mühafizə orqanları tərəfindən sözügedən hadisə qətl cəhdi kimi qiymətləndirilib.

Versiyalardan birinə görə, partlayış nəqliyyat vasitəsinin sahibinin xidməti fəaliyyəti ilə bağlıdır.

Faktla bağlı cinayət işi açılıb, araşdırmalara başlanılıb.