Nikolayev raketlə vuruldu: ölən və yaralananlar var

Rusiya Silahlı Qüvvələri Ukraynanın Nikolayev şəhərini raket atəşinə tutub. Bu barədə Ukrayna Prezidenti Volodimir Zelenski “Telegram”da məlumat verib.

O bildirib ki, şəhərə 4 “Kalibr” raketi atılıb. Hadisə nəticəsində 1 nəfər mülki şəxs həyatını itirib, biri uşaq olmaqla 23 nəfər isə yaralanıb.

“İşğalçı ölkə müharibədəki əsas məqsədinin terror aktları törətmək və dinc ukraynalıları məhv etmək olduğunu bir daha sübut etdi. Bu cinayətlərdə əli olan hər kəs məsuliyyətə cəlb olunacaq”, – deyə Prezident vurğulayıb. Qeyd edək ki, Rusiya Ordusunun 2022-ci ilin fevralın 24-də Ukraynada başlatdığı xüsusi hərbi əməliyyat bu günə kimi davam edir.