Qrossi Rusiya və Ukrayna arasındakı bu razılaşmanı alqışladı - Baku TV

Atom Enerjisi üzrə Beynəlxalq Agentliyin vasitəçiliyi ilə Rusiya ilə Ukrayna arasında lokal atəşkəs haqqında daha bir razılaşmadan sonra Zaporojye Atom Elektrik Stansiyası yaxınlığındakı əsas elektrik xəttində təmir işləri başlayıb.

Agentliyin mətbuat xidməti bu barədə "X" sosial media platformasında xəbər verib.

"AEBA-nın vasitəçiliyi ilə lokal atəşkəsdən sonra Zaporojye Atom Elektrik Stansiyasının yaxınlığındakı elektrik xəttində mühüm təmir işləri başlayıb", – deyə AEBA-nın baş direktoru Rafael Qrossi bildirib.

Təşkilatın mütəxəssislərindən ibarət qrup bir neçə gün davam etməsi gözlənilən təmir işlərini müşahidə edir. Bu tədbirlər hərbi münaqişə zamanı nüvə hadisəsinin qarşısını almağa yönəlib.

R.Qrossi eyni zamanda münaqişənin hər iki tərəfinə Zaporojye Atom Elektrik Stansiyası və Zaporojye İstilik Elektrik Stansiyasının paylayıcı yarımstansiyaları arasında elektrik enerjisinin ötürülməsinin bərpasına imkan verəcək və bununla da nüvə təhlükəsizliyini gücləndirəcək başqa müvəqqəti sükut pəncərəsi yaratmaq barədə razılığa gəldiklərinə görə təşəkkür edib.