Rusiya ABŞ-nin sanksiyalarından yayına biləcək?

ABŞ-nin ölkənin iki ən iri neft hasilat şirkətinə qarşı tətbiq etdiyi yeni sanksiyalar səbəbindən Rusiya dövlət büdcəsinə böyük zərbə gözlənilir. Lakin “yanacaqdoldurma məntəqəsi ölkəsi” bu zərbəni yumşaltmaq imkanına malikdir.

Bu barədə “Blumberq” nəşri yazıb.

Nəşrlə anonimlik şərti ilə danışan rusiyalı məmurlardan biri etiraf edib ki, yeni Amerika məhdudiyyətləri nəticəsində büdcə itkiləri qaçılmaz olacaq. Bununla belə, Rusiya bu zərərləri öz neft treyderləri şəbəkəsini və “kölgə donanmasını” genişləndirməklə azaltmağa çalışacaq.

Başqa bir rusiyalı rəsminin sözlərinə görə, Rusiya məhdudiyyətlər tam qüvvəyə minənədək bir aylıq hazırlıq müddətinə malikdir və bu dövrdən yeni vəziyyətə uyğunlaşmaq üçün istifadə edəcək.

O həmçinin ABŞ-nin sanksiyalarla bağlı mövqeyini dəyişə biləcəyini də istisna etməyib. “İstisna deyil ki, Tramp da Kremllə danışıqların gedişindən asılı olaraq öz mövqeyini dəyişə bilər”, – deyə mənbə bildirib.

Jurnalistlər qeyd edirlər ki, ABŞ sanksiyaları fonunda Hindistan neft emalı şirkətləri artıq, demək olar ki, alışları tamamilə dayandıracaqlarını bəyan ediblər.

“Əgər bu baş verərsə, Moskva üçün alternativ müştərilər tapmaq böyük çətinlik yaradacaq və bu, potensial olaraq Çin tərəfinə qiymətlərə təsir baxımından əhəmiyyətli təsir gücü verəcək", – deyə nəşr vurğulayır.

Bildirilir ki, Amerika sanksiyalarından əvvəl belə Rusiyanın neft-qaz gəlirlərinin dörd il ərzində ən aşağı səviyyəyə düşəcəyi proqnozlaşdırılırdı.