Rusiya buranı nəzarətə götürdü | Ukrayna Ordusunun qisas cəhdi necə nəticələndi? - Baku TV

Rusiya Ordusu son 24 saat ərzində 149 yerdə Ukraynanın hərbi-sənaye müəssisələrinə, enerji obyektlərinə, nəqliyyat infrastrukturuna, eləcə də Ukrayna qoşunlarının müvəqqəti yerləşdirmə məntəqələrinə zərbələr endirib.

Bu barədə Rusiya Müdafiə Nazirliyi məlumat yayıb. Bildirilib ki, Rusiya hava hücumundan müdafiə sistemləri iki idarə olunan hava bombasını ələ keçirib və 130 sabit qanadlı pilotsuz uçuş aparatını vurub.

Rusiya qüvvələri Zaporojye bölgəsində bir yaşayış məntəqəsini nəzarətə götürüb və Kupyansk istiqamətində iki Ukrayna hücumunu dəf edib. Elə həmin gün Ukrayna Silahlı Qüvvələrinin Baş Qərargahı son bir gün ərzində cəbhə xəttində 173 döyüşün baş verdiyini və Ukrayna qüvvələrinin Rusiyanın müxtəlif istiqamətlərdə onlarla hücumunu dəf etdiyini açıqlayıb.

Ukrayna Ordusundan həmçinin Luqansk bölgəsində Rusiyanın ortamənzilli hava hücumundan müdafiə raket sisteminə zərbələr endirildiyi, birbaşa zərbə və partlayışın baş verdiyi, eləcə də Xerson bölgəsində Rusiyanın 49-cu Birləşmiş Silahlı Ordusuna məxsus anbara hücum edildiyi bildirilib.

Bundan əlavə, Ukrayna Müdafiə Qüvvələri Xəzər dənizində “Lukoil” neft şirkətinə məxsus üç qazma qurğusunu, Luqansk bölgəsində müvəqqəti ələ keçirilmiş ərazidə Rusiyanın “Buk-M3” zenit-raket sistemini və Xerson bölgəsində Rusiya Ordusunun bir bölməsini məhv etdiyini açıqlayıb.