Rusiya sanksiyalara meydan oxuyur? | Peskovdan Ukraynaya kritik mesaj - Baku TV

"Fridrix Merzin Rusiyanın Ukrayna üçün təhlükəsizlik zəmanətlərinin hazırlanmasında iştirakını istisna etmək zərurəti ilə bağlı verdiyi açıqlama Avropa İttifaqının mövqeyinin çıxılmaz mahiyyətini nümayiş etdirir. Rusiyanın iştirakı olmadan təhlükəsizlik zəmanətlərini formalaşdırmaq mümkün deyil. Əgər bu, həqiqətən də, avropalıların möhkəm mövqeyidirsə və onlar buna israr edirlərsə, onda bu, Avropa ölkələrinin nizamlama prosesində iştirak etmə ehtimalını tamamilə sıfıra endirir".

Bu sözləri Rusiya Prezidentinin mətbuat katibi Dmitri Peskov deyib.

Rusiyanın iştirakı olmadan Ukrayna üçün heç bir təhlükəsizlik zəmanətinin ola bilməyəcəyini açıqlayan Dmitri Peskov Rusiyanın Avropa İttifaqı ölkələrində kritik infrastruktura qarşı kiberhücumlarda iştirakını da təkzib edib və onlara qarşı irəli sürülən ittihamların əsassız olduğunu bildirib.

"Biz Rusiyanın Avropada, o cümlədən Polşa enerji şəbəkələrinə qarşı kiberhücumlarda iştirakı ilə bağlı iddiaları qəbul etmirik. Bildiyiniz kimi, Rusiya artıq illərdir ki, onunla heç bir əlaqəsi olmayan şeylərdə ittiham olunur. Həmişəki kimi, bu ittihamlar əsassızdır. Onlar heç vaxt tutarlı dəlillə dəstəklənmir. Sanksiyalara gəldikdə isə biz onları həmişə qanunsuz hesab etmişik. Ölkəmizə tətbiq edilən onminlərlə sanksiyaya uyğunlaşmışıq. Bu sanksiyalardan yayınmağı, onların yaratdığı mənfi təsiri azaltmağı öyrənmişik. Bunu etməyə davam edəcəyik", – deyə Kremlin sözçüsü əlavə edib.

Qeyd edək ki, iyulun 13-də Böyük Britaniya və Avropa İttifaqı Rusiyaya qarşı sanksiyalar elan ediblər. Qərb Rusiyanı ötən il Avropada xaos və nifaq salmaq məqsədi daşıyan kiberhücumlar təşkil etməkdə ittiham edir.