Rusiya-Ukrayna müharibəsində azyaşlılar oğurlanıb?

Rusiya-Ukrayna müharibəsində ən həssas əraziyə çevrilən Xerson son vaxtlar yenidən təhlükə altındadır.

Vilayətin 9 aylıq mübarizədən sonra 2022-ci ilin noyabrında geri qaytarılan Dneprin sağ sahilindəki hissəsi kəskin hücumlarla üz-üzədir.

Xerson hərbi administrasiyasının rəhbəri Oleksandr Prokudin hazırkı vəziyyətlə bağlı Baku TV-nin Şərqi Avropa bürosuna açıqlama verib.

O bildirib ki, Xerson vilayəti hər gün düşmən ordusunun atəşi altındadır, vəziyyət çox gərgindir:

“Ərazinin cəmi 30 faizi işğaldan azad edilib, 70 faizi isə hələ də düşmən tərəfindən zəbt olunub. Bu, təxminən 1600 mərmi mənasına gəlir. Bu, yalnız işğaldan azad edilmiş ərazilərə aiddir. Hazırda 49 ərazi icmasından 17-si işğaldan azad edilib.

Mövcud vəziyyəti nəzərə alsaq, indi təkcə 27 mindən çox obyekt ya dağılmış, ya da zədələnmiş vəziyyətdədir. Sol sahildə, hazırda işğal altında olan ərazinin 70 faizində nə olacağını təsəvvür etmək belə çətindir”.

“Vilayətimizin mindən çox əhalisi hələ də itkin düşmüş sayılır. Yəni onların harada olduğu məlum deyil. Şahidlərin sözlərinə görə, onların bəziləri girovluqdadır. Daha əvvəl fiziki imkanları məhdud uşaqlar Rusiya ərazisinə aparılıb. İndi biz beynəlxalq təşkilatlarla birlikdə yavaş-yavaş onları ailələrinə sağ-salamat geri qaytarmağa çalışırıq. Onlar mindən çox uşağı Rusiyaya aparıblar. Bunlar əsasən ailəsiz aparılan uşaqlardır”, – o əlavə edib.

Qeyd edək ki, Xersonda Dnepr çayının hər iki sahilindən tərəflər arasında artilleriya atışmaları şiddətlənib.