Rusiyada miqrantlarla bağlı qeyri-adi yenilik | "Qırmızı işıq yanırsa..."

Moskvada miqrantları elektron tətbiq vasitəsilə izləyəcəklər.

Bu barədə Moskva meri Sergey Sobyanin "İnterfaks"a müsahibəsində deyib.

Sergey Sobyaninin sözlərinə görə, Moskvanın icra qurumları miqrantların nəzarətdə saxlanılması məqsədilə Moskva regionunda bir sıra eksperimentlərin aparılmasına icazə alıblar.

Moskva meri qeyd edib ki, bütün hava limanlarında miqrantların biometrik nəzarəti tətbiq olunub. Həmçinin Moskva ərazisində miqrantların bütün məlumatları daxil edilmiş elektron kart istifadəyə veriləcək.

"QR-kod vasitəsilə polis həmin şəxslə bağlı hər şeyi öyrənə bilər ‒ nə vaxt gəlib, hansı müddətə, harada işləyir, miqrasiya pozuntusu var, ya yox. Əgər qırmızı işıq yanırsa, polisin onu saxlaması vacibdir. Yaşıldırsa, heç bir sual yaranmır", ‒ deyə mer vurğulayıb.

Sobyanin həmçinin qeyd edib ki, Miqrasiya Mərkəzində onların genetik məlumat bazası formalaşdırılır. Toplanmış məlumatlar FTX və Daxili İşlər Nazirliyinin bazasına daxil edilir.

Şəhərdə işləyən “üz tanıma sistemi” ilə bu məlumatlar inteqrasiya olunub, bu da lazım gəldikdə miqrantların harada olduğunu dəqiq müəyyən etməyə imkan verir.

Məlumata görə, Rusiyaya iş üçün vizasız rejimlə gələn miqrantlar öz telefonlarına “Amina” adlı xüsusi tətbiqi yükləməli olacaqlar. Bu tətbiq isə fasiləsiz olaraq miqrantların olduğu yer barədə məlumatları Rusiyanın Daxili İşlər Nazirliyinə ötürəcək.