Rusiyadan böyük hərbi əməliyyat | Ukrayna komandanlığı detalları açıqladı

Yanvarın 23-də paytaxt Kiyev də daxil olmaqla Ukraynanın əsasən cənub və şərq vilayətləri kütləvi raket zərbələrinə məruz qalıb.

Səhər tezdən başlayan hücum demək olar ki, yerli vaxtla günortaya qədər davam edib.

Ağır raketlərin istifadə olunduğu hava hücumları zamanı ölkə üzrə 6 nəfər həlak olub, 40 nəfər yaralanıb. Ukrayna hava hücumundan müdafiə qüvvələri raket zərbələrinin hamısının qarşısını ala bilməyib.

Ukrayna Hərbi Hava Qüvvələri komandanlığının rəsmisi Yuri İqnatın verdiyi məlumata görə, Rusiya Ordusu tərəfindən 41 raket buraxılıb, 20-si Ukrayna hava hücumundan müdafiə qüvvələri tərəfindən məhv edilib:

“Buraya 15 ədəd X-101, X-555, 8 ədəd X-22, 2 ədəd X-59, 4 ədəd S-300 və S-400, 12 ədəd “İsgəndər-M” və ballistik raketlər, “Tu-22M3” bombardmançı təyyarəsi daxildir. Bu günə qədər zərərsizləşdirmədiyimiz raketlərin heç də hamısı hədəflərinə çatmayıb. Çünki bütün Rusiya raketləri yüksək keyfiyyətli deyil. Raketlərin hamısı hədəfə çatmır. Təəssüf ki, zərərçəkənlər, ölümlər, dağıntılar var. Amma ümumilikdə zenit müdafiəsini uğurlu əməliyyat hesab etmək olar”.

Qeyd edək ki, günün sonuna yaxın yenidən bütün Ukrayna üzrə hava hücumundan xəbərdarlıq siqnalları verilməyə başlayıb.