Rusiyalı generalın ordu əleyhinə səs yazısı yayıldı

Son zamanlar Rusiyanın hərbi hissələrində baş verən daxili çaxnaşma, daha dəqiq desək, generalların səssiz üsyanı davam edir. Silahlı Qüvvələrin Cənub Hərbi Dairəsinin 58-ci Ordusunun komandanı, “Spartak” ləqəbli general-mayor İvan Popov ordudakı problemlərlə bağlı yuxarı instansiyalara məruzəsindən sonra xidmətdən uzaqlaşdırılıb.

Bu məlumatı Dövlət Dumasının deputatı və Cənub Hərbi Dairəsi komandirinin keçmiş müavini Andrey Qurulyov paylaşıb. O, İ.Popovun səs yazısını da yayıb:

“Hər zaman olduğu kimi, bu gün də sizinlə səmimi olacağam. Yüksək səviyyəli rəhbərliklə vəziyyət çətindir. İki variant var idi, ya susmaq, baş verənlərə göz yummaq, onların eşitmək istədiklərini söyləmək, ya da hər şeyi olduğu kimi danışmaq. Mənim sizin xətrinizə, müharibədə ölən dostlarımızın xatirinə yalan danışmağa haqqım yox idi. Ona görə də orduda mövcud olan bütün problemli məsələləri açıqladım, müharibənin ən mühüm faciəsindən, qardaşlarımızın kütləvi şəkildə həlak olmasından və silah-sursat çatışmazlığından bəhs etdim. Başqa məsələləri də qaldırdım. Görünür, böyük komandirlər məndə hansısa təhlükə hiss etdilər və dərhal bir gün ərzində əmr verərək məndən qurtuldular. Rusiyada bir çox komandirlərin dediyi kimi, Ukrayna Ordusunun hərbçiləri bizi cəbhədən çıxara bilmədilər. Amma böyüyümüz bizi xaincəsinə və alçaqcasına vurdu”. Qeyd edək ki, Andrey Qurulyov iyulun 12-də Rusiya Silahlı Qüvvələri Cənub Hərbi Dairəsinin komandir müavini, general-leytenant Oleq Tsokovun Berdyanskda Ukrayna Silahlı Qüvvələrinin raket zərbəsi nəticəsində öldürüldüyü məlumatını da ictimailəşdirmişdi. Ehtiyatda olan general-leytenantın keçmiş silahdaşlarının taleyi barədə bu cür narahatlıq doğuran məlumatlar yayması Rusiya Ordusunun Cənub Hərbi Dairəsində vəziyyətin o qədər də ürəkaçan olmadığını və zabitlər arasında ciddi narazılıqların yaşandığını göstərir.