Rusiyalı politoloqlar Belqoroda hücumu şərh edib
Rusiyanın Belqorod vilayətində vəziyyət gərgin olaraq qalır. Ölkənin Müdafiə Nazirliyindən bildirilib ki, vilayətə daxil olan 70-dən çox ukraynalı diversant məhv edilib.
Belqorodda baş verənləri Baku TV-yə şərh edən rusiyalı hərbi ekspert Yevgeni Mixaylov bildirib ki, ukraynalılar vilayətə hücum etməklə yalnız mülki əhaliyə qarşı döyüşmək qabiliyyətini nümayiş etdirmiş oldular.
“Aydındır ki, bu, Rusiya Federasiyasının mülki əhalisi arasında iğtişaşları artırmağa yönəlmiş addım idi. Onların etdikləri gülünc formada diqqəti Baxmutda verdikləri itkilərdən yayındırmaq üçündür. Kremlin sözçüsü Dmitri Peskovun xüsusi hərbi əməliyyatı davam etdirməyin zəruriliyi ilə bağlı bəyanatını dəstəkləyirəm. Hətta deyərdim ki, bu xain hücumdan sonra biz sərhəddə təhlükəsizlik tədbirlərini gücləndirərək qarşı tərəfə daha qəddar şəkildə cavab verməliyik. Bu hərəkətlərlə ukraynalı hərbçilər özlərinin ölüm əmrlərini imzalamış oldular, çünki onlar bütün beynəlxalq hüquq normalarından kənara çıxıblar. Ukraynalılar hərbçilərə deyil, dinc əhalinin yaşadığı kəndlərə hücum ediblər. Rusiya Ordusu isə bunu heç vaxt etməzdi. Biz dinc əhalini qoruyaraq yalnız əsgərlərə qarşı vuruşuruq”, – deyə hərbi ekspert qeyd edib.