Rusiyanın Xəzərdəki enerji infrastrukturu hücuma məruz qaldı

Ukrayna Təhlükəsizlik Xidmətinin pilotsuz uçuş aparatları bir həftə ərzində üçüncü dəfə Xəzər dənizindəki Rusiya neft hasilatı platformalarına zərbə endirib.

Bu barədə "RBK-Ukraina" mənbələrə istinadən məlumat yayıb.

Bu dəfə "Alfa" xüsusi əməliyyatlar mərkəzinin uzaqmənzilli dronları "Lukoil-Nijnevoljskneft" şirkətinin Korçagin yatağındakı platformasını vurub. Hücum nəticəsində avadanlıq zədələnib və obyektin istehsal prosesi dayandırılıb.

Qeyd edək ki, 11 və 12 dekabrda dronlarla Filanovski və Korçagin yataqlarındakı platformalara hücum edilib. Filanovski yatağı Rusiyanın və onun Xəzər dənizi sektorunun ən iri yataqlarından biridir, ehtiyatları 129 milyon ton neft və təxminən 30 milyard kubmetr qaz olaraq qiymətləndirilir.

Dekabrın 12-də həmçinin Xəzər dənizində, Kalmıkiya sahilləri yaxınlığında iki Rusiya tankeri vurulub. Ukrayna tərəfinin məlumatına görə, hədəfə alınan gəmilər silah və hərbi texnika daşıyırdı.

Zərbə endirilən Rusiya gəmilərinin "Raxmaninov" və "Askar-Sarıdja" olduğu bildirilir. Qeyd olunur ki, hər iki tanker hərbi məqsədlər üçün istifadə olunur və İran–Rusiya arasında hərbi yüklərin daşınmasında iştirak etdiklərinə görə ABŞ sanksiyaları altındadır.