Terror aktı ilə bağlı Ərdoğan Putinə zəng etdi

Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə telefon danışığı aparıb və “Crocus City Hall” konsert mərkəzində törədilmiş terror aktı nəticəsində insanların ölümü ilə bağlı kədərini bölüşüb.

Bu barədə Türkiyə Prezidenti Administrasiyası məlumat yayıb.

Qeyd edilib ki, R.T.Ərdoğan Moskvada baş verən terror aktı ilə bağlı V.Putinə dərin hüznlə başsağlığı verib. Türkiyə Prezidenti günahsız insanlara qarşı törədilən mənfur terror aktını kəskin şəkildə pisləyib və Rusiya xalqına başsağlığı verib, səbir diləyib.

R.T.Ərdoğan bölgədəki böhranları ən qısa müddətdə sülh yolu ilə başa çatdırmağın vacibliyini deyib. O qeyd edib ki, Türkiyə istisnasız olaraq terrorizmlə mübarizə sahəsində Rusiya ilə əməkdaşlığı inkişaf etdirməyə hazırdır.