BMT bu müharibəni dayandırsın | Ukraynalı rəsmidən vacib çağırış

Ukraynada 2 ildən çoxdur davam edən müharibə yüzlərlə yaşayış binaları ilə yanaşı, zavodlar, fabriklər və kənd təsərrüfatı subyektlərini də sıradan çıxarıb.

Bu səbəbdən nəinki Ukraynanın özü, hətta müharibəyə qədər bu ölkədən taxıl və ərzaq məhsulları ilə təmin olunan digər regionlar da ciddi ərzaq böhranı ilə üzləşiblər.

Ukrayna Ali Radasının komitə sədri Stepan Çernyavski Baku TV-yə açıqlamasında deyib ki, əkin sahələrinin təxminən 20%-nin üzərində nəzarət itirilib:

“Ukrayna təkbaşına bu problemi həll edə bilməz, bu aydındır. Böyük əraziləri azad etmək lazımdır, çoxlu vəsait lazımdır. Minatəmizləmə məsələləri, logistika məsələlərinin həlli, müasir toxum sortlarının alınması, yanacaq təchizatı, mineral gübrələr indi və dərhal həll edilməli olan problemlər zənciridir. Çünki sabah çox gec ola bilər və bütün dünyada ərzaq təhlükəsizliyi ilə bağlı olduqca çox çətin vəziyyət yarana bilər”.

Ukraynalı rəsmi bildirir ki, ölkəsi qarşıdan gələn Sülh Formulu konfransında toplaşan dünya ölkələrindən bununla bağlı ciddi həll yolu gözləyir, əks halda dünyanın üçdə birini ərzaq çatışmazlığından xilas etmək mümkün olmayacaq.

“Ukrayna ən böyük kənd təsərrüfatı məhsulları istehsalçılarından biridir. Dünyadakı bütün taxıl məhsulunun 2%-ni istehsal edirdi. Müharibə olduğu üçün məhsulların dünya ərzaq bazarına çıxarılmaması və qıtlıq riski var. Biz BMT-yə çatdırmalıyıq ki, o, nəhayət, əsas vəzifələrini yerinə yetirsin və Ukraynaya qarşı müharibəni dayandırsın. Müharibədən əvvəl ərzaq ixracı təqribən 76 milyon ton təşkil edirdi. Hazırda isə bu rəqəm 46 milyon tondur. Odessa vilayətinin logistika mərkəzləri və limanlarının düşmən tərəfindən davamlı atəşə tutulması səbəbindən bu il belə bir həcmin yarısını belə təmin edə bilməyəcəyimiz üçün real təhlükə var”, – deyə S.Çernyavski əlavə edib.