Ukrayna Baş Kəşfiyyat İdarəsindən iddia

“Rusiya təhlükəsizlik orqanlarına “Vaqner” Xüsusi Hərbi təşkilatının rəhbəri Yevgeni Priqojini öldürmək tapşırılıb”.

Bu iddia ilə Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov çıxış edib. Onun sözlərinə görə, bu, asan məsələ deyil, buna görə də bir az vaxt aparacaq.

“Təhlükəsizlik orqanlarının bunu bacarıb-bacarmayacaqları təbii ki, sual altındadır”, – deyən Budanov bildirib ki, Ukrayna kəşfiyyatı belə bir silahlı qiyamın baş verəcəyindən xəbərdar idi.

“Rusiya daxilində sabitliyi pozmağa yönəlmiş hərəkətlər Ukrayna üçün faydalıdır. Lakin proses uzun çəkmədi. Buna görə də qiyamın müharibəyə təsirindən danışmaq olmaz”, – deyə o vurğulayıb.