“Vəsait olmasa, dron istehsalını azaltmalı olacağıq” | Volodimir Zelenski

“Ukrayna 2026-cı ilin yazına qədər Avropa İttifaqından (Aİ) maliyyə yardımı almazsa, dronların istehsalını azaltmalı olacaq”.

Bunu Ukrayna Prezidenti Volodimir Zelenski Avropa Şurasının iclasının keçirildiyi Brüsseldə mətbuat konfransında bildirib.

“Biz dondurulmuş Rusiya aktivlərini istəyirik və bu, danışıqlar prosesinin bir hissəsi deyil. Əgər bu imtiyaz əlimizdə olsa, danışıqlar masasında daha arxayın şəkildə hərəkət edərik. Bundan əlavə, müvafiq tranş alınmazsa, Ukraynada dronların istehsalı dəfələrlə azalacaq. Onu da deyim ki, Ukraynanın tərəfdaşları ölkəyə maliyyə yardımı ilə bağlı yekun qərarı 2025-ci ilin sonuna qədər qəbul edə bilərlər”, – deyə o qeyd edib.

“Ukrayna ABŞ ilə sülh planı üzrə danışıqlarda irəliləyiş əldə edir” deyən Zelenski hesab edir ki, Rusiya avropalıların sülh danışıqlarında iştirak etməyini istəmir:

“Rusiyanın bu istəyi həyata keçməməlidir. Avropanın mövcudluğu Rusiyanın bizə qarşı hücumlara yenidən başlamasına imkan verməyəcək. Eyni zamanda mən bir suala cavab almaq istəyirəm: əgər Rusiya yenidən bizə hücum etsə, ABŞ buna nə reaksiya verəcək?”.

Qeyd edək ki, Avropa İttifaqı 2026-2027-ci illərdə Ukraynaya 90 milyard avro ayırmağı planlaşdırır.