“Vəziyyət xeyli pisləşib” | Rusiya-Ukrayna müharibəsində son durum

“Rusiya Ordusu hazırda Pokrovsk istiqamətində daha çox güc nümayiş etdirsə də, Zaporojye bölgəsində də fəaliyyətini artırıb. Döyüşlərin təxminən 40 faizi Pokrovskda gedir. Rusiya Ordusu davamlı olaraq ciddi itkilər verir. Hava şəraitinin dumanlı olmasından istifadə edən Rusiya hərbçiləri mövqelərimizə daxil olur. Bu səbəbdən vəziyyət xeyli pisləşib”.

Bu barədə Ukrayna Silahlı Qüvvələrinin Baş Komandanı Aleksandr Sırski özünün “Telegram” kanalında məlumat verib.

O qeyd edib ki, Ukrayna bölmələri çətin şəraitə baxmayaraq, əksər hücumları dəf edir və müəyyən ərazilərdə axtarış-zərbə əməliyyatlarını davam etdirir.

Aleksandr Sırski əlavə edib ki, Rusiya Ordusu hər metr Ukrayna torpağına görə yüzlərlə əsgər itirir. Noyabrın 9-dan bəri təkcə Pokrovsk ətrafında Rusiyanın 800 hərbçisi və 100-dən çox texnikası məhv edilib.

Son sutka ərzində isə Rusiya Ordusunun min hərbi qulluqçusu öldürülüb, 87 texnikası sıradan çıxarılıb. Məlumatı Ukrayna Silahlı Qüvvələrinin Baş Qərargahı yayıb.

Ukrayna mətbuatında yayılan məlumatlarda bildirilib ki, Rusiyanın Budyonnovsk şəhərinə dronlarla hücum həyata keçirilib. Nəticədə “Stavrolen” neft-kimya şirkətinin yaxınlığında yanğın baş verib.

Rusiya Müdafiə Nazirliyindən isə bildirilib ki, gecə ərzində Ukraynanın 22 PUA-sı məhv edilib.