“WhatsApp”, “Facebook”, “Instagram” və “YouTube”a görə ölənlər var

Nepalda sosial şəbəkələrin qadağan edilməsinə və korrupsiyaya qarşı etirazlar davam edir. İğtişaşlar zamanı azı 14 nəfər həyatını itirib. Onlarla insan yaralanıb.

Xarici medianın məlumatına görə, polis izdihama qarşı su şırnaqları, dəyənəklər və rezin güllələrdən istifadə edib. Etirazçılardan bir neçəsi zərbələr nəticəsində yaralanıb və xəstəxanaya aparılıb.

Buna cavab olaraq bir qrup etirazçı parlamentə doğru hərəkət edən təhlükəsizlik avtomobilinin hərəkətinə mane olub. Eyni zamanda onlar təcili yardım maşınını yandırıblar. Minlərlə şəxsin polis bariqadasını dağıdaraq parlamentə daxil olmaq cəhdindən sonra hökumət həmin ərazidə komendant saatı tətbiq edib.

Məlumat üçün bildirək ki, bir neçə gün bundan əvvəl Nepal hökuməti 26 sosial media platformasının ölkənin yeni qeydiyyat tələblərinə əməl etməməsi, ünsiyyət və söz azadlığı ilə bağlı narahatlıqlar doğurması səbəbi ilə istifadəsini qadağan edib. Qadağan olunan sosial medialar arasında “WhatsApp”, “Facebook”, “Instagram və “YouTube” da var.