Zaporojye və Dnepropetrovskda ölənlər var | Müharibədə son vəziyyət

Ukrayna Silahlı Qüvvələrinin Baş Qərargahından bildirilib ki, iyulun 28-dən 29-na keçən gecə 172 döyüş qeydə alınıb, Rusiya silahlı qüvvələrinin 1050 hərbçisi öldürülüb.

Rusiya silahlı qüvvələri Ukraynaya 2 “İskəndər-M” raketi atıb, hücumlarda 37 ŞAHED dronundan istifadə olunub.

Zaporojye vilayətində cəzaçəkmə müəssisəsi isə bombalanıb. Bu barədə Zaporojye vilayət administrasiyasının rəhbəri İvan Fyodorov məlumat yayıb. Bildirilib ki, hadisə nəticəsində ölən və yaralananlar var.

“Düşmən gecə ərzində Zaporojyeni 8 dəfə atəşə tutub. Cəzaçəkmə müəssisəsi vurulub və nəticədə 16 nəfər ölüb, 35 nəfər yaralanıb. Xəsarət alan şəxslər dərhal xəstəxanaya yerləşdirilib. Həbsxana ilə yanaşı, yaxınlıqda olan evlərə də ziyan dəyib, yanğınlar baş verib”, – deyə Fyodorov əlavə edib.

Dnepropetrovskun hərbi administrasiyasının rəhbəri Sergey Lısak vilayətin kamikadze dronlarla atəşə tutulduğunu açıqlayıb. 2 nəfər həlak olub, 5 nəfər ağır yaralanıb. Onlardan biri hamilə qadındır. Bununla yanaşı, yaşayış binaları zədələnib, bir xəstəxananın doğum şöbəsinə ziyan dəyib.

Ukrayna ordusu Rostov vilayətinin Salsk şəhərinə dron hücumu həyata keçirib. Dəmiryol stansiyanın yaxınlığında yanğınların qeydə alındığı bildirilir.

Rusiya Müdafiə Nazirliyindən isə bildirilib ki, hava hücumundan müdafiə qüvvələri gecə ərzində Ukraynaya məxsus 74 PUA-nı məhv edib.