Şiddətli zərbə | Müharibənin ən gərgin mərhələsi başlayır? - "Böyük hücuma hazırlıq gedir" - Baku TV

Ukraynada müharibə yenidən ən gərgin mərhələlərindən birinə daxil olur. Gecə saatlarında Rusiyanın həyata keçirdiyi kütləvi raket və pilotsuz uçuş aparatı hücumları ölkənin bir neçə bölgəsində dağıntılara, yanğınlara və insan itkilərinə səbəb olub.

Rəsmi Kiyev isə xəbərdarlıq edir ki, bu daha böyük zərbələrin başlanğıcı ola bilər.

Martın 24-nə keçən gecə Ukraynanın müxtəlif şəhərlərində partlayış səsləri eşidilib. Ən ağır zərbələrdən biri Poltava və Zaporojye şəhərlərinə endirilib. Yaşayış binaları, hotel və sənaye obyektləri hədəf alınıb.

Rəsmi məlumatlara görə, hücumlar nəticəsində azı 4 nəfər həyatını itirib, 16 nəfər yaralanıb. Xilasedicilər dağıntılar altında qalan insanları çıxarmaq üçün saatlarla işləyiblər. Zaporojye şəhərində çoxmərtəbəli binalar alova bürünüb. Poltavada isə raket zərbəsi nəticəsində yaşayış infrastrukturu ciddi zərər görüb.

Ukrayna Hərbi Hava Qüvvələri bildirir ki, Rusiyanın buraxdığı 392 pilotsuz aparatın 365-i, 34 raketin isə 25-i məhv edilib. Buna baxmayaraq, hücumların miqyası ölkə üzrə geniş panika yaradıb.

Gecə demək olar ki, bütün Ukraynada hava həyəcanı siqnalları verilib. Hətta Polşa belə hava məkanını qorumaq üçün qırıcılarını havaya qaldırıb.

Ukrayna kəşfiyyatı xəbərdarlıq edir ki, Rusiya cəbhədəki uğurlarını şişirdərək daha böyük hücum planları hazırlayır. Məqsəd isə həm hərbi, həm də psixoloji təzyiqi artırmaqdır.

Bu arada Moskvanın uzaqmənzilli dronlar üçün yeni idarəetmə stansiyaları qurmağa hazırlaşdığı bildirilir. Bu isə hücumların daha koordinasiyalı və dəqiq olacağından xəbər verir.

“Rusiya Ukraynaya qarşı yeni kütləvi hücumlara hazırlaşır və biz bununla bağlı kəşfiyyat məlumatları əldə etmişik. Onlar yalnız cəbhədə deyil, eyni zamanda mülki infrastruktura qarşı da təzyiqi artırmaq niyyətindədirlər. Biz Hava Hücumundan Müdafiə sistemlərimizi gücləndirmişik və bütün aidiyyəti qurumlara müvafiq tapşırıqlar verilib. Lakin bu miqyaslı hücumların qarşısını tam almaq üçün beynəlxalq tərəfdaşların dəstəyi həlledici olaraq qalır. Rusiya bu hücumlarla müharibəni uzatmağa və vəziyyəti daha da mürəkkəbləşdirməyə çalışır. Biz isə həm müdafiə olunacaq, həm də cavab verəcəyik”, – Ukrayna Prezidenti Volodimir Zelenski deyib.

Rəsmi Kiyev bildirir ki, Moskvanın məqsədi Ukraynanı yoraraq təslim etməkdir. Lakin hazırkı vəziyyət göstərir ki, hava hücumları nə qədər intensivləşsə də, Ukrayna müdafiəsini davam etdirir.