Zelenski Putinə son sözünü dedi | İstanbul danışıqlarına hansı şərtlə gedəcək?

Ukrayna Prezidenti Volodimir Zelenski mayın 15-də İstanbulda keçirilməsi planlaşdırılan Rusiya-Ukrayna münaqişəsinin həllinə yönəlmiş danışıqlarda yalnız bir halda iştirak edəcəyini bildirib.

Zelenskinin yeganə şərti danışıqlarda Vladimir Putinin də şəxsən iştirak etməsidir.

Zelenskinin sözlərinə görə, qeyd-şərtsiz 30 günlük atəşkəs razılaşması danışıqların əsas məqsədlərindən biridir.

O bildirib ki, Rusiya ilə sülhə aparan yolun başlanğıcı məhz bu addımdan keçməlidir.

“Biz müharibənin sonunun başlanğıcı ilə bağlı razılığa gəlmək istəyirik. Putin isə mənimlə birbaşa danışıqlardan qorxur”, – deyə Zelenski vurğulayıb.

Ukrayna lideri əlavə edib ki, Kreml rəhbəri Türkiyəyə gələcəyi ilə bağlı hələ heçbir məlumatı təsdiqləməsə də, o, Vladimir Putini gözləyəcək. Çünki, məqsədləri sülhə nail olmaqdır.

Ukrayna lideri “Liberation”a müsahibəsində əlavə edib ki, Putinlə şəxsən görüşəcəyi təqdirdə tam atəşkəs və bütün məhbusların mübadiləsi məsələsini qaldıracaq.

“Nə ruslar ukraynalılara güvənəcək, nə də ukraynalılar ruslara, ona görə də tərəflər arasında razılaşmaların yerinə yetirilməsinə yalnız kənar vasitəçilər təminat verə bilər. Atəşkəs rejiminə nəzarətin qarantı məhz ABŞ ola bilər. Hesab edirəm ki, ABŞ Prezidenti Donald Trampın İstanbul görüşündə iştirakı Putini gəlməyə həvəsləndirə bilər”, ‒ deyə Zelenski vurğulayıb.