“Atası dedi ki, fikir vermə” | 17 yaşlı oğlan anasını amansızlıqla öldürdü?

Xaçmazın Çaykənarı kəndində qətl hadisəsi baş verib.

Kənd sakini Həqiqət Məmmədova bıçaqlanaraq öldürülüb. Hadisəni qadının 17 yaşlı oğlunun törətdiyi bildirilir.

Məlumata görə, yeniyetmə anasını qısqanclıq zəminində qətlə yetirib.

“İki oğlu var, balacası öldürüb anasını. Hadisə telefon üstündə baş verib. Oğlu deyib ki, danışma, telefonu ver, sındıracağam”, – mərhumun qohumu deyib.

Yaralı Xaçmaz Rayon Mərkəzi Xəstəxanasına çatdırılsa da, həyatını xilas etmək mümkün olmayıb.

Xaçmaz Rayon Mərkəzi Xəstəxanasının həkimi Orxan Şeydayev bildirib ki, oktyabrın 29-u saat 19:30 radələrində 1983-cü il təvəllüdlü şəxs (qadın) tibb müəssisəsinə hospitalizasiya olunub:

“Ona döş qəfəsinin, qarının ön divarının kəsilmiş-deşilmiş yaraları, daxilə nüfuz etməklə sol dirsək oynağı, sağ saidin, sol əlin ovuc hissəsinin çoxsaylı kəsilmiş yaraları diaqnozu təyin olunub. Göstərilən bütün reanimasiya tədbirlərinə və həkimlərin çoxsaylı səylərinə baxmayaraq, oktyabrın 30-da saat 19:15 radələrində pasiyentin bioloji ölüm faktı qeydə alınıb”.

Qətli törətməkdə şübhəli bilinən 17 yaşlı yeniyetmə saxlanılıb. Faktla bağlı Xaçmaz Rayon Prokurorluğunda araşdırma aparılır.