Axşam harada qalacağımı bilmirəm | Hacıqabul sakinləri çarəsiz vəziyyətdə

Oktyabrın 12-si səhər saatlarından başlayan güclü yağış Hacıqabul rayonunda selə səbəb olub. Sel suları xüsusilə rayon mərkəzində yerləşən evlərin həyətlərinə dolub.

Evlərini tərk edən sakinlər onlara xeyli ziyan dəydiyini bildiriblər.

“Divanda yatmışdım, gördüm ki, ayağıma su dəydi. Evim suyun içindədir. Axşam harada qalacağımı bilmirəm”, – deyə sakin söyləyib.

Rayon Fövqəladə Hallar Komissiyası tərəfindən bildirilib ki, sel suları rayon mərkəzində 150-dən çox fərdi yaşayış evinə ziyan vurub. Rayonun bir hissəsinə elektrik verilişi dayandırılıb.

Bundan əlavə, rayon ərazisindən keçən dəmiryolu xəttinə də ziyan dəyib. Qatarların hərəkətində müəyyən fasilələr yaranıb.

Bu barədə “Azərbaycan Dəmir Yolları” QSC tərəfindən də açıqlama verilib.

Bildirilib ki, qurum regionlarda müşahidə olunan qeyri-sabit hava şəraiti və yağan leysan xarakterli güclü yağışlar səbəbindən Hacıqabul stansiyası ərazisində dəmiryol xətlərindən sel keçməsi ilə əlaqədar hərəkətin təhlükəsizliyini təmin etmək məqsədilə Bakı-Ağstafa-Bakı və Bakı-Qəbələ-Bakı marşrutları üzrə hərəkət edən sərnişin qatarlarının sürət həddini endirib.

Bununla əlaqədar ərazidə infrastruktura baxış keçirilib. Bu səbəblə qatarların qrafikində qismən gecikmə halları müşahidə olunub.

“Hərəkət iştirakçılarına bu cür hava şəraitində dəmiryol keçidlərindən istifadə zamanı yüksək sayıqlıq göstərməyi və ehtiyatlı olmağı tövsiyə edir, sərnişinlərdən stansiya və platformalarda qatarları gözləyərkən diqqətli olmaları xahiş edilir”, – deyə qurumdan bildirilib.