Bədənində sağlam yeri yoxdur | Ananın uşağına etdiyi dəhşətli əməllər ifşa olundu

Sosial şəbəkələrdə övladını küncə qoyaraq cəzalandıran, fəxrlə bədənində sağlam yer qoymadığını deyən, ünvanına nalayiq ifadələr işlədən qadının videosu yayılıb.

Azyaşlı qızına amansız işgəncələr verən ananın əməllərini ifşa edən isə uşağın dayəsi olub.

“Azərbaycan Uşaqları” İctimai Birliyinin sədri Kəmalə Ağazadə bildirib ki, bir sutkadır axtarılan qadın artıq tapılıb:

“Uşaq gecə saatlarında Sosial Xidmətlər Agentliyinin və Suraxanı Rayon İcra Hakimiyyətinin aidiyyəti komissiyasının əməkdaşları tərəfindən sığınacağa yerləşdirilib. Azyaşlının başında çömçə sındırılıb, bütün bədəni uzunmüddətli işgəncələrin izi ilə doludur”.

Məsələ ilə bağlı Daxili İşlər Nazirliyindən isə qeyd edilib ki, polis əməkdaşları tərəfindən azyaşlıya zorakılıq göstərən anası saxlanılıb və barəsində Cinayət Məcəlləsinin əzab vermə maddəsi ilə cinayət işi başlanılıb:

“Xəsarətlərin dərəcəsini müəyyən etmək məqsədilə müvafiq ekspertiza təyin olunub, araşdırma aparılır”.