Buzovnada 3 nəfəri qətlə yetirən şəxsə ağır cəza verildi

Paytaxtın Xəzər rayonu, Buzovna qəsəbəsində keçmiş qayınatası, qayınanası və qaynını qətlə yetirməkdə təqsirləndirilən Nofəl Səfərova hökm oxunub.

Hökm Bakı Ağır Cinayətlər Məhkəməsinin hakimi Leyla Əsgərova-Məmmədovanın sədrliyi ilə keçirilən prosesdə elan edilib. Nofəl Səfərov ömürlük azadlıqdan məhrum edilib. Ötən prosesdə dövlət ittihamçısı Orxan Səmədov məhkəmədən təqsirləndirilən şəxsin ömürlük azadlıqdan məhrum edilməsini istəmişdi.

Xatırladaq ki, hadisə 2023-cü il noyabrın 29-da Xəzər rayonunun Buzovna qəsəbəsində qeydə alınıb. Həmin gün saat 20 radələrində 1939-cu il təvəllüdlü Elbrus Muradov, oğlu – 1971-ci il təvəllüdlü Rahil Muradov, həyat yoldaşı – 1945-ci il təvəllüdlü Şahirə Muradova kəsici alətlə qətlə yetirilib, nəvəsi – 1997-ci il təvəllüdlü Elbrus Ağalarov isə bədən xəsarəti alıb.

Aparılan araşdırmalarla ailənin keçmiş kürəkəni, 1976-cı il təvəllüdlü Nofəl Səfərovun şəxsi münasibətlər zəminində aralarında yaranan mübahisə zamanı onları qəsdən öldürməsinə əsaslı şübhələr müəyyən edilib.

Polis əməkdaşlarının keçirdikləri əməliyyat-axtarış tədbirləri nəticəsində Nofəl Səfərov şübhəli şəxs qismində saxlanılaraq istintaqa təhvil verilib. Ona qarşı Cinayət Məcəlləsinin 120.2.7 – iki və ya daha çox şəxsi öldürmə və 120.2.11-ci – quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə maddələri ilə ittiham irəli sürülüb.