Mingəçevirdə bədbəxt hadisə | Şagird məktəbdə həyatını itirdi

Mingəçevirdə şagird dərs zamanı dünyasını dəyişib.

Hadisə şəhərdə yerləşən 5 nömrəli tam orta məktəbdə baş verib.

Qəfil halı pisləşən 15 yaşlı Yusif Yusifovun həyatını xilas etmək üçün təcili tibbi yardım çağırılıb. Amma onun həkiməqədər ölümü qeydə alınıb.

Yusif ailənin yeganə övladı olub. O, kinqboks idman növü ilə məşğul olurmuş. Gələcəkdə hərbi məktəbdə təhsil alaraq daha böyük uğurlar qazanmaq arzusunda imiş.

Hadisə ilə bağlı TƏBİB məlumat yayıb. Bildirilib ki, Təcili və Təxirəsalınmaz Tibbi Yardım Mərkəzinə fevralın 5-də saat 10:47-də Mingəçevir şəhəri, 5 nömrəli tam orta məktəbdən şəxsin halının pisləşməsi ilə bağlı çağırış daxil olub. Çağırış ünvanına təcili tibbi yardım briqadası cəlb olunub. Amma 2010-cu il təvvəllüdlü oğlanın həkiməqədər ölüm faktı qeydə alınıb.

Mərkəzi Aran Regional Təhsil İdarəsindən isə bildirilib ki, məsələ ilə bağlı aidiyyəti qurumlara məlumat verilib. Məktəblinin hansı səbəbdən vəfat etməsi ilə bağlı müvafiq qurumlar tərəfindən araşdırma aparılır.