"Qorxa-qorxa yaşayırıq" | Kanalizasiya kollektoru partladı, sakinlər təşvişə düşdü - Baku TV

Bakı şəhəri, Əhmədli qəsəbəsi, Tofiq Hacıyev küçəsi 86 ünvanında kanalizasiya kollektoru ilə bağlı ciddi qəza qeydə alınıb.

Baku TV-nin qaynar xəttinə daxil olan şikayətdə sakinlər bildirirlər ki, kollektor xəttinin partlaması nəticəsində ərazidə kanalizasiya suları küçə və həyətlərə axır, yaşayış üçün təhlükəli vəziyyət yaranıb.

Onlar iddia edirlər ki, dörd həyət evi birbaşa risk altındadır, bəzi evlərin bünövrəsində çökmələr müşahidə olunur. Həmçinin ərazidəki güclü üfunət qoxusu nəfəs almaqda çətinlik yaradır. Kanalizasiya suları isə artıq evlərin girişinə qədər çatıb.

Sakinlərin sözlərinə görə, dəfələrlə aidiyyəti qurumlara müraciət olunsa da, problem həll olunmayıb.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, ərazidə kollektorun üzərində inşa edilmiş tikililərin yaratdığı yüklənmə nəticəsində şəbəkədə qəza baş verib. Şəbəkənin üzərində yaşayış evinin olması hazırda xətdə müdaxilə edib təmir və bərpa işlərinin görülməsini qeyri-mümkün edib.

Qeyd edilib ki, su və tullantı su kollektorlarının magistral və paylayıcı xətlərin üzərində, eləcə də onların mühafizə zolaqlarında hər hansı tikinti işlərinin aparılması qanunvericiliyə ziddir.

Məsələ ilə bağlı Bakı Sukanal İdarəsi tərəfindən əraziyə baxış keçirilib. Müvafiq işlərin görülməsi üçün aidiyyəti üzrə müraciət olunub.