“Yazıq balalar...” | Xətaidəki faciənin detalları | “Düşüb üstünə, yorğanın tükü boğub...” - Baku TV

Xətai rayonu, Əhmədli qəsəbəsi ərazisində yerləşən ərzaq satışı köşkündə yanğın baş verib.

Hadisə ilə əlaqədar Fövqəladə Hallar Nazirliyinin Dövlət Yanğından Mühafizə Xidmətinin qüvvələri dərhal əraziyə cəlb olunub.

Yanğınsöndürənlərin operativ müdaxiləsi nəticəsində alovun daha geniş sahəyə yayılmasının qarşısı alınaraq qısa müddətdə söndürülüb.

Hadisə zamanı köşkün daxilindəki yataq dəsti qismən yanıb. Yanğın yerinin kəşfiyyatı zamanı 1968-ci il təvəllüdlü Ağayar Xanhüseyn oğlu Əliyevin meyiti aşkar olunub.

Sakinlər hadisə ilə bağlı Baku TV-yə danışıblar.

“30 il idi ki, buradakı köşkdə işləyirdi. Elə köşkdə də yatırdı. Hadisə səhər saatlarında baş verib. Yorğan sobanın üstünə düşərək alışmağa başlayıb. Səhər yoldan keçən biri mağazadan tüstü çıxdığını görüb, qapını döysə də, açan olmayıb. Şüşəni sındıraraq içəri giriblər. Görüblər ki, yerə yıxılıb, yorğan da yanır. Ailəli idi. Qonşularla çox mehriban rəftar edərdi, hamıya əl tutan adam idi”, – onlardan biri söyləyib.