Sürücü idarəetməni itirib dəhşətli qəza törətdi | Kənd sakini hadisəni danışdı

Zaqatalanın Yengiyan kəndində minik avtomobili qaz xəttinə və yaşayış evinə çırpılıb.

Rayonun Kəpənəkçi kənd sakini minik avtomobili ilə hərəkətdə olarkən idarəetməni itirib və maşın yolun kənarındakı 108 millimetrlik qaz xəttinə çırpılıb. Qəzadan sonra qaz xəttində yanğın baş verib və 320 abonent qazsız qalıb.

Hadisə zamanı kənd sakini Laləzar Orucovaya məxsus evin hasarının bir hissəsi dağılıb.

“Oturmuşduq evin içində, gördük ki, yanğın baş verib. Çıxdıq çölə, evin üstü yanırdı. Camaat kömək etdi, su tökdük. Yanğınsöndürənlər gəlib çatana kimi alov artıq söndürülmüşdü”, – deyə ev sahibi bildirib.

Qəza zamanı avtomobildə olan iki sərnişin, rayonun Kəpənəkçi kənd sakinləri – 42 yaşlı Elmar Babayev və 47 yaşlı Kəlmət Heydərova xəsarət alıb. Yaralılara Zaqatala Rayon Mərkəzi Xəstəxanasında ilkin yardım göstərildikdən sonra onlar ambulator müalicə almaq üçün evə buraxılıb.

Qeyd edək ki, qaz təchizatında yaranan fasilə bərpa edilib. Faktla bağlı müvafiq qurumlar tərəfindən araşdırma aparılır.