Xəstənin başına açmadıqları oyun qalmadı | Sensasiya yaradan həkim özbaşınalığı

Bakıda liposaksiya prosesini icra edən şəxsin peşə fəaliyyətinə zidd olan görüntüləri yayılıb.

Belə ki, sosial şəbəkələrdə yayılan görüntülərdə özünü həkim kimi təqdim edən Gülbadə Abdullayevanın liposaksiya əməliyyatı zamanı pasiyentin narkoz altında ikən qeyri-etik hərəkətlər və əməliyyat alətləri ilə rəqs etdiyi əks olunub.

Məsələ ilə bağlı Səhiyyə Nazirliyi “Baku TV”nin sorğusunu cavablandırıb.

Analitik Ekspertiza Mərkəzindən bildirilib ki, sosial şəbəkələrdə yayılan videogörüntülərdə adı hallanan Gülbadə Abdullayevanın adı Tibb işçilərinin vahid reyestrində mövcud deyil və tibbi fəaliyyətlə məşğul olmaq səlahiyyəti yoxdur:

“Daxil olan sorğularda əməliyyatın “Dost Estetik Mərkəzi”ndə keçirildiyi bildirilir. Digər müraciətdə isə həmin şəxsin “UĞUR Estetik Mərkəzi 777” adlı müəssisədə çalışdığı qeyd olunur. Onların hər ikisi tibb müəssisəsi deyil və müvafiq tibbi fəaliyyət göstərmək üçün lisenziyaları yoxdur.

“Dost Estetik Mərkəzi”nin adı Analitik Ekspertiza Mərkəzinin özəl tibb müəssisələrinin bazasında, eləcə də Dövlət Vergi Xidmətinin Vergi uçotuna alınmış vergi ödəyiciləri barədə məlumat bazasında mövcud deyil”.

Həmçinin araşdırma zamanı müəyyən edilib ki, sahibkar Xəyalə İsmayılovaya məxsus “UĞUR Estetik Mərkəzi 777”nin lisenziya olmadan tibbi fəaliyyət göstərdiyi müəyyən edilib.