Zaqataladakı ağacların kəsilməsinə görə cinayət işi açıldı | Baş Prokurorluqdan açıqlama

Zaqatala rayonunda avtomobil yolunun kənarında çoxillik ağacların kəsilməsi ilə bağlı Baku TV-də material yayımlanmışdı.

Baş Prokurorluğun mətbuat xidmətindən verilən məlumata görə, artıq faktla bağlı cinayət işi açılıb.

Zaqatala-Danaçı-Aşağı Çardaxlar avtomobil yolunun sağ və sol kənarında olan çoxillik ağacların kəsilməsi və qanunsuz olaraq budanması faktı üzrə Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 259.2.3 (şəxs tərəfindən öz qulluq mövqeyindən istifadə etməklə qanunsuz olaraq ağac kəsmə) və 308.2-ci (ağır nəticələrə səbəb olan vəzifə səlahiyyətlərindən sui-istifadə etmə) maddələri ilə cinayət işi başlanılaraq ibtidai istintaq aparılır.

Məsələ Zaqatala Rayon İcra Hakimiyyətində də müzakirə olunub. Vəzifələrini yerinə yetirə bilmədiyinə, ərazisində ekoloji nəzarətin təşkilində yol verdiyi səhlənkarlığa görə Maqov inzibati ərazi dairəsi üzrə nümayəndə Ramazan Davudov tutduğu vəzifədən azad edilib.