İspaniya, Belçika və İtaliya AVRO 2024-ün seçmə mərhələsində qələbə qazanıb
AVRO-2024-ün seçmə mərhələsində 6-cı turun böyükhesablı qələbələrindən biri İspaniyada qeydə alınıb.
Kipr millisini qəbul edən “Qırmızı Furiya” rəqibin qapısından 6 cavabsız top keçirib. Pireneylilərin heyətində Ferran Torres dubl edib. Digər qollar Qavi, Mikel Merino, Xoselu və Aleks Baenanın aktivindədir.
Xallarının sayını 9-a çatdıran İspaniya millisi A qrupunda 2-ci yerdədir. Komanda lider Şotlandiyadan 6 xal geri qalır. Xalsız olan Kipr seçməsi isə qrup sonuncusudur.
Daha bir darmadağın Brüsseldə qeydə alınıb. Estoniya millisinini qəbul edən Belçika futbolçuları 5-0 hesablı qələbə qazanıblar. Romelu Lukakunun dubl etdiyi görüşdə Yan Vertongen, Leandro Trossar və De Ketelare də rəqibin qapısına yol tapıblar. Ardıcıl 3-cü matçda güclü olan belçikalılar xallarının sayını Avstriya ilə bərabərləşdiriblər. Bu kollektivlər F qrupunda 1-ci, 2-ci yerləri bölüşdürürlər.
C qrupunda yer alan İtaliya yığması da turu qələbə ilə tamamlayıb. Ukrayna millisini qəbul edən “Skuadra Adzurra” Davide Frattezinin dublu sayəsində 2-1 hesabı ilə qalib gəlib. Bu nəticədən sonra 7 xalı olan İtaliya seçməsi Ukrayna və Şimali Makedoniya komandaları ilə birlikdə 2-ci, 4-cü yerləri bölüşdürür.