“Qarabağ”ın ulduz futbolçusu “Fənərbağça”ya keçməyə yaxındır
“Qarabağ”ın aparıcı futbolçularından Olavio Juninyo “Fənərbağça”ya keçə bilər.
Yerli mətbuatda yayılan məlumata görə, hücum xəttini gücləndirmək istəyən İstanbul nəhəngi Juninyonu yaxından izləyir.
Maraqlıdır ki, “Fənər” “Neftçi”nin sabiq qol silahı, hazırda isə Serbiya “Partizan”ında çıxış edən Mateus Saldanyanı da transfer etmək niyyətindədir. Lakin Türkiyə təmsilçisinin skautları Juninyonun daha keyfiyyətli forvard olduğu və Superliqaya daha tez uyğunlaşacağı qənaətindədirlər.
Son xəbərlərə görə, “Qarabağ” Olavionu itirmək niyyətində deyil və braziliyalıya yüksək təzminat məbləğinin nəzərdə tutulduğu yeni müqaviləni təklif edəcək.
Qeyd edək ki, Olavio Juninyo ötən ilin yayında Portuqaliyanın “Şaviş” klubundan “Qarabağ”a keçib. “Köhlən atlar”la sözləşməsi 2026-cı ilə qədər olan oyunçu 33 matçda 19 qolun müəllifidir.