Azərbaycan-Vyetnam Hökumətlərarası Komissiyasının 3-cü iclası | Fəaliyyət Planı qəbul edildi

Azərbaycan-Vyetnam iqtisadi-ticarət və elmi-texniki əməkdaşlıq üzrə Hökumətlərarası Komissiyanın 3-cü iclası keçirilib.

Vyetnamın paytaxtı Hanoyda baş tutan iclasda siyasi, ticarət, investisiya, enerji, nəqliyyat, kiçik və orta sahibkarlıq, turizm, kənd təsərrüfatı, müdafiə sənayesi, mədəniyyət, təhsil və digər sahələr üzrə əlaqələrin cari vəziyyəti nəzərdən keçirilib.

Bildirilib ki, ticarət dövriyyəsi 2025-ci ilin ilk beş ayında 5,4 faiz artaraq 58,4 milyon ABŞ dollarına çatıb ki, bu da əməkdaşlıqda müsbət dinamikanın göstəricisidir. Birgə səylər bu rəqəmin və qarşılıqlı sərmayələrin daha da artırılmasına töhfə verəcək.

Enerji sahəsində əməkdaşlığa toxunularaq qeyd olunub ki, “SOCAR Trading”in Vyetnam bazarında aparıcı spot tədarükçülərdən biri kimi fəaliyyəti, xam neftin tədarükü və Vyetnam neftinin beynəlxalq satışlarında iştirakı bu sahənin əsas istiqamətlərindəndir.

Həmçinin qeyd edilib ki, mədəni və humanitar sahələrdə əməkdaşlıqda artan dinamika müşahidə olunur. 2025-ci ilin aprel ayında Heydər Əliyev Fondunun vitse-prezidenti Leyla Əliyevanın Vyetnama səfəri çərçivəsində keçirilmiş mədəni və xeyriyyə tədbirləri bu istiqamətdə qarşılıqlı marağın bariz nümunəsidir.

Sonda Hökumətlərarası Komissiyanın 3-cü iclasının yekunlarına dair Protokol imzalanıb və 2025-2027-ci illəri əhatə edən Fəaliyyət Planı qəbul edilib.