Azərbaycanda dərmanların qiyməti ucuzlaşacaq?

Azərbaycanda dövlət qeydiyyatına alınan dərmanlar apteklərdə yenidən fərqli qiymətlərə satıla bilər.

Bununla bağlı “Dərman vasitələri haqqında” Qanuna dəyişiklik edilməsi gözlənilir.

Qeyd edək ki, 2015-ci ildən başlayaraq mərhələlərlə dövlət qeydiyyatına alınan dərmanların qiymətinin Tarif Şurası tərəfindən müəyyən olunmasına start verilib. Lakin təklif olunan dəyişikliyə görə, dərman vasitələri üçün vahid qiymət yox, qiymətin yuxarı həddi müəyyən olunacaq.

Qanuna dəyişikliyin əhali üçün əhəmiyyəti nə olacaq? İqtisadçı ekspert Eyyub Kərimli bildirib ki, qanuna edilən dəyişiklik sayəsində ölkəmizdə tapılmayan dərmanları apteklərdən əldə edə biləcəyik.

Bir sözlə, tibbi vasitələrin, xüsusilə də pərakəndə satış üçün vahid qiymət siyasətinin müəyyən edilməsi ilə dərmanları daha aşağı qiymətə almaq mümkün olacaq. Yuxarı həddin müəyyən olunması rəqabət şəraitinin formalaşmasına, hətta ucuzlaşmaya səbəb ola bilər.