Avropa ölkələri onlardan asılıdır | İlham Əliyevdən önəmli açıqlamalar

“Müstəqil siyasət aparmaq iqtidarında olan ölkələrin sayı da o qədər də çox deyil. Trampın bir sözü ilə Kanadanın Baş naziri istefaya getdi. Axı Kanada Azərbaycandan 10 dəfə çox neft hasil edir – 300 milyon ton. Əhalisi də cəmi 40 milyondur. Əgər başqa iqtisadiyyat olmasa belə, 40 milyonu 300 milyon tonla yola vermək olmaz? Görün bunların iqtisadiyyatı nə qədər bərbad vəziyyətdədir ki, Amerika onlara əlavə rüsum tətbiq etsə, iqtisadiyyatları çökəcək”.

Bunu Prezident İlham Əliyev yanvarın 7-də yerli televiziya kanallarına müsahibəsində bildirib.

Dövlət başçısı qeyd edib ki, yeni dünya nizamı formalaşanda Azərbaycanın mövqeyi də nəzərə alınacaq:

“Cənab Tramp deyəndə ki, Kanada 51-ci ştat olmalıdır və cənab Trüdo qubernator olmalıdır, bu, əlbəttə trollinq kimi sayıla bilər. Amma əslində, bu sözlərdə bəlkə də məntiq var. Avropa ölkələrinə baxın, onlar güc mərkəzlərindən, bəzən də başqa faktorlardan nə qədər asılıdır. Ona görə müstəqil siyasət aparmaq iqtidarında olan ölkələr çox deyil. Bizim bu sahədəki siyasətimiz haqlı olaraq bizə rəğbəti daha da artırır. Əminəm ki, yeni dünya nizamı tam formalaşma prosesinə düşəndə, Azərbaycanın mövqeyi də nəzərə alınacaq – ən azı Cənubi Qafqazda və Xəzər hövzəsində. Biz buna hazır olmalıyıq”.