Azərbaycan QHT-ləri 5 il ərzində nələrə nail olub?

Son 5 ilin müşahidələri göstərir ki, Azərbaycan QHT-ləri artıq milli səviyyədən çıxaraq ölkənin hüdudlarını aşıb. QHT-lərimiz beynəlxalq müstəvidə çoxsaylı təşəbbüslərin həyata keçirilməsinə müvəffəq olur. Azərbaycanın xarici siyasət kursuna dəstək olan həmin fəaliyyətlər ictimai diplomatiyanın bir parçası olaraq uğurlu şəkildə davam etdirilir.

Bu işlər çərçivəsində ortaya qoyulacaq fəaliyyətlər, şübhəsiz ki, ölkəmizin milli maraqlarına cavab verir. Bu həm də Azərbaycanın beynəlxalq müstəvidə reputasiyasının güclənməsi deməkdir.

Baxmayaraq ki, kənardan kifayət qədər təzyiqlər oldu. Xüsusilə Vətən müharibəsindən sonra həmin təzyiqlər daha çox hiss edildi. Həm vətəndaş cəmiyyətini parçalamaq istədilər, həm də Azərbaycan QHT-lərini müxtəlif səmtlərə yönəltməyə çalışdılar. Məsələn, Laçın aksiyasında Azərbaycan QHT-ləri monolit duruş sərgiləyərək həmin qüvvələrə tutarlı cavab verdi.

Artıq Azərbaycan QHT-lərinin fəaliyyəti hansısa epizodik tədbirlərin keçirilməsi ilə məhdudlaşmır. Həmin tədbirlər nəticəyönümlü xarakterdədir. Bu gün cəmiyyətdə neqativ hallara qarşı mübarizədə Azərbaycan QHT-ləri ictimai qınağın hərəkətverici qüvvəsi kimi çıxış edir. Məsələn, bəzi ictimai birliklərin saxta orden, medallar paylamağı cəmiyyətdə ciddi etirazlar doğurub. Həmin etirazlar müvafiq olaraq araşdırılıb və məyusedici vəziyyətə son qoyulub.

Eləcə də QHT sektoruna süni axın xeyli daralıb. 2022-ci illə müqayisədə 2024-cü ildə yeni QHT-lərin dövlət qeydiyyatına alınması 4 dəfə azalıb. Yeni QHT yaratmağa dair müraciətlərin sayı isə 2022-ci illə müqayisədə bu il 3 dəfə aşağı düşüb. Bu isə mövcud sahənin kifayət qədər mürəkkəb olduğunun göstəricisidir.

Məlumatlara görə, qarşıdakı dövrdə QHT-lərlə bağlı bir sıra qanunvericilik aktlarının da təkmilləşdirilməsi, islahatların dərinləşdirilməsi nəzərdə tutulur.