Azərbaycan və İtaliya Baş Qərargah rəisləri görüşdü: təntənəli qarşılama

Oktyabrın 31-də müdafiə nazirinin birinci müavini Baş Qərargah rəisi Kərim Vəliyev Azərbaycanda səfərdə olan İtaliya Silahlı Qüvvələrinin Baş Qərargah rəisi Cüzeppe Kavo Draqonenin rəhbərlik etdiyi nümayəndə heyəti ilə görüşüb.

Bu barədə Müdafiə Nazirliyindən məlumat verilib. İki ölkənin Baş Qərargah rəisləri arasında təkbətək və geniş tərkibdə görüş keçirilib.

Ordu quruculuğu sahəsində aparılan genişmiqyaslı islahatlardan danışan Kərim Vəliyev Vətən müharibəsində qazanılan tarixi qələbə və Qarabağda həyata keçirilən lokal xarakterli antiterror tədbirlərinin əhəmiyyəti haqqında ətraflı məlumat verib.

Azərbaycan Ordusunda yeni texnologiyaların tətbiqi və kibertəhlükəsizlik sahəsində görülən işlərin əhəmiyyətini diqqətə çatdırıb. Admiral Cüzeppe Kavo Draqone iki ölkə arasındakı münasibətlərin tərəfdaşlığa söykənən hərbi əlaqələrin daha da genişləndirilməsinin zəruriliyini xüsusi vurğulayıb.

Tərəflər Azərbaycan və İtaliya arasında hərbi, hərbi-texniki, hərbi-təhsil və digər sahələrdə əməkdaşlığın inkişaf perspektivləri, habelə qarşılıqlı maraq doğuran bir sıra məsələləri müzakirə ediblər.