Azərbaycan XİN-dən bəzi Avropa ölkələrinə çağırış

“İtaliyanın xarici işlər və beynəlxalq əməkdaşlıq nazirinin müavininin verdiyi açıqlama ilk növbədə beynəlxalq hüququn təməl prinsip və normalarına hörmətin əlamətidir”.

Bunu Xarici İşlər Nazirliyinin mətbuat katibi Ayxan Hacızadə İtaliyanın Xarici İşlər və Beynəlxalq Əməkdaşlıq Nazirliyinin bölgədəki vəziyyətlə bağlı açıqlamasına dair yerli medianın sualına cavabında deyib.

O bildirib ki, bu, eyni zamanda ölkələrin daxili işlərinə müdaxilənin və Azərbaycanla Ermənistan arasında normallaşma və sülh prosesi kimi həssas məsələ ilə bağlı məsuliyyətsiz yanaşmadan çəkinilməsinin nə dərəcədə vacib olduğunu nümayiş etdirir.

“İtaliya tərəfinin həm münaqişə, həm də post-münaqişə dövründə bölgə üzrə sərgilədiyi siyasət və yanaşma daim balanslı olub. Bu ölkə tərəfindən beynəlxalq hüququn pozuntularını gözardına alan siyasətdən qaçınılması bir daha İtaliya tərəfinin məsələdən daim agah olduğunu göstərib və Fransa kimi ölkələrin yürütdüyü destruktiv siyasətin nə dərəcədə əsassız və nəticəsiz olduğunu sübut edib”, – deyə nazirliyin sözçüsü vurğulayıb.

A.Hacızadə əlavə edib ki, İtaliya tərəfindən yürüdülən bu siyasət başda Fransa olmaqla bəzi Avropa ölkələrinə nümunə olmalıdır.