Bu addımlar cinayət xarakterlidir | Ceyhun Bayramovdan mühüm açıqlama

Son bir həftə ərzində Azərbaycanın dövlət rəmzinə qarşı ardıcıl iki təxribat törədilib: əvvəlcə Ermənistanda, sonra Fransada. Hər iki hadisədə bayrağımız nümayişkəranə şəkildə yandırılıb. Bu, sadəcə vandalizm aktı deyil, bir xalqın heysiyyətinə qarşı yönəlmiş açıq hücumdur.

Azərbaycanın Xarici İşlər Naziri Ceyhun Bayramov məsələ ilə bağlı açıq mövqe sərgiləyib. ATƏT-in baş katibi ilə keçirdiyi mətbuat konfransında bildirib ki, bu addımlar cinayət xarakterlidir və aidiyyəti ölkələrin məsul qurumları buna hüquqi qiymət verməlidir:

“Bu, utancverici hərəkətdir. Biz ictimai qınağın da güclü olmasını vacib hesab edirik”.

Bu, ilk belə hal deyil. Bənzər hadisə 2023-cü ilin aprelində də yaşanıb. İrəvanda keçirilən idman tədbirində Azərbaycan bayrağı arenanın ortasında yandırılmış, hadisəni törədən şəxs isə sonradan mühafizə olunmuşdu. O vaxt da Azərbaycan tərəfi buna sərt reaksiya vermişdi.

Fransada baş verən son hadisə isə erməni diasporunun radikal qanadının təşkilatçılığı ilə reallaşıb. Avropa dəyərləri adı ilə illərlə təqdim olunan tolerantlıq mühiti artıq nifrət mesajlarının meydanına çevrilir. Bayraq yandırmaqla verilən mesaj isə sadədir: nifrət hələ də real, revanşizm xəyalları hələ də canlıdır.

Ancaq bir həqiqət dəyişmir: bayrağa od vurmaqla xalqın iradəsini yandırmaq mümkün deyil. Əksinə, bu alov bəzən bir millətin içindəki birliyi daha da alışdırır. Çünki bayraqlar parçadan deyil, tarixdən, qürurdan, müqavimətdən toxunur.