Erməni fəal terrorçu separatçıların həbsindən danışdı: Olanlardan heç İrəvan da narahat deyil

Azərbaycanın Qarabağda həyata keçirdiyi uğurlu lokal xarakterli antiterror tədbirləri ölkə suverenliyinin bərpası ilə yanaşı, qondarma rejimin bir sıra rəhbər şəxslərinin də saxlanılaraq Bakıya gətirilməsi ilə nəticələndi.

Ancaq separatçıların liderlərinin həbsinə, deyəsən, heç İrəvanda üzülənlər də olmadı. Hətta antiterror tədbirləri zamanı Ermənistanın Baş naziri Nikol Paşinyanın Qarabağ məsələsinə görə Azərbaycanla münasibətlərin korlanmasının tərəfdarı olmadığını deməsi onsuz da mövcud olmayan qondarma respublika xəyallarına birdəfəlik son qoydu.

Bölgədə baş verən bu hadisələri Baku TV-yə şərh edən erməni fəal İşxan Verdyan bir çox məqamlara aydınlıq gətirməklə yanaşı, həbslərin gözlənilən olduğunu da dedi.

O bildirdi ki, Qarabağın cinayətkar simalarının həbsi heç də təsadüfi deyil. Onlar layiqli cəzalarını almalıdırlar:

“Həbs edilənlər dindiriləndə isə əminəm ki, Qarabağda cərəyan edən bir çox gizli, üstü örtülü və qanundan kənar özbaşınalıqlar ifşa ediləcək. Sözügedən cinayət əməllərindən bəhs edərkən mən təkcə ayrı-ayrı şəxslərin əməllərini deyil, həm də beynəlxalq oyunları da nəzərdə tuturam. Əminəm ki, Azərbaycanın hüquq mühafizə orqanları dindirmələrdən sonra dünyaya qondarma rejimin əsl iç üzünü göstərə biləcək.

Bütün bu həbslərə rəsmi İrəvanın reaksiyası isə özünəməxsusdur. Saxlanılanların hansı cinayətlərdə əllərinin olduğu unudularaq, ara-sıra onların azad edilməsinə dair çağırışların səsləndirildiyini gördük. Amma bu dəstək cinayətkarların azadlığa buraxılması istəyindən və ya cəmiyyətin onları çox sevdiyindən irəli gəlmir. Sadəcə Ermənistan tərəfinin istənilən mövzuda Azərbaycanla ədavətli münasibət nümayiş etdirmək kimi vərdişləri var”.

İşxan Verdyanın sözlərinə görə, İrəvanda heç kim saxlanılan şəxslərin günah sahibi olduğunu və onların Qarabağda cinayətlərə imza atması faktını etiraf etmək istəmir: “Bütün bunların Azərbaycan rəhbərliyinin verəcəyi qərara təsir etməyəcəyinə əminəm”.