Erməni məmur Paşinyanın son açıqlamalarına münasibət bildirdi

“Baş nazir Nikol Paşinyanın Azərbaycanla silahlara qarşılıqlı nəzarət mexanizmi və bir-birinə hücum etməmək paktının imzalanması ilə bağlı bəyanatları siyasi xarakter daşıyır”.

Bunu Ermənistanın xarici işlər nazirinin müavini Vahan Kostanyan jurnalistlərə açıqlamasında deyib.

Bildirib ki, həmin bəyanatlara hələlik heç bir siyasi reaksiya yoxdur. Onun sözlərinə görə, əgər müvafiq müsbət siqnallar olarsa, müzakirələr təbii olaraq başqa mərhələyə keçəcək:

“Ermənistan öz qonşuları ilə münasibətlərin tam nizamlanmasında və sülh müqaviləsinin imzalanmasında səmimi olaraq maraqlıdır. Artıq bilirsiniz ki, yanvarın 4-də biz müvafiq sazişin mətninin yenilənmiş variantını Azərbaycan tərəfinə göndərmişik. Buna görə də biz Azərbaycandan cavab gözləyirik. Bir neçə həftə ərzində cavab veriləcəyi deyilib".

V.Kostanyan həmçinin Rusiyanın Ermənistandakı səfirini dəyişmək istəməsi ilə bağlı xəbərlərə də aydınlıq gətirib. Bildirib ki, rəsmi Moskvadan Xarici İşlər Nazirliyinə hər hansı məktub daxil olmayıb.