Ermənistan və Azərbaycanın danışıqları niyə uğursuz oldu? | Dövlət sirri açıqlanır, amma...

Ermənistan parlamentinin spikeri Alen Simonyan etiraf edib ki, bir sıra hallarda Azərbaycanla danışıqlar erməni tərəfinin məlumat sızdırması səbəbindən uğursuz olub.

Bu barədə spiker jurnalistlərə açıqlamasında bildirib.

Onun sözlərinə görə, məlumat sızıntısının günahkarı Ermənistanın hakim partiyasının deputatı Ovik Aqazaryandır.

“Baş nazir Nikol Paşinyan gəlib bizə Azərbaycan Prezidenti İlham Əliyevlə görüşünün təfərrüatlarını danışır, Baş nazir dövlət sirri olan məlumatları bölüşür. O isə bütün bunları açıqlayır.

Bu normaldırmı? Ermənistan hakimiyyəti bir ildən çox məlumat sızıntısının mənbəyini axtarıb. Partiya məsələləri olsa idi, yenə dərd yarı idi. Amma söhbət Ermənistanın təhlükəsizliyindən gedəndə, bu məsələni belə saxlamaq olmaz. Bir müddət əvvəl elə hallar olub ki, Azərbaycanla danışıqlar pozulub, münasibətlər gərginləşib. Biz şərti desək, ola bilər razılaşmaları pozmuşuq, ucadan nə isə demişik, məlumat sızdırmışıq. Bundan sonra get sübut et ki, bu fraksiyanın üzvü müsahibəni və ya məlumatı qəsdən yox, səhvən verib”, – deyə erməni spiker bidirib.

Qeyd edək ki, bir neçə gün əvvəl deputat Ovik Aqazaryan Ermənistanın hakim “Mülki müqavilə” Partiyasının sıralarından xaric edilib. İdarə Heyətinin qərarı ilə Ovik Aqazaryan dövlət və partiya əhəmiyyətli məxfi məlumatları sızdırdığına, habelə etik normaları kobud şəkildə pozduğuna görə “Mülki müqavilə”dən uzaqlaşdırılıb.