Ermənistanın Konstitusiyasına nə vaxt dəyişiklik ediləcək? | Detallar açıqlandı

“Bizim yeni Konstitusiyanın qəbulu ilə bağlı gündəliyimiz var və mən son tarix kimi 2027-ci ili göstərmişəm. İndi layihə üzərində işləyirik və hazır olanda referendum keçirəcəyik”.

Bunu Ermənistanın Baş naziri Nikol Paşinyan hökumətin avqustun 21-də keçirilən iclasından sonra jurnalistlərin suallarını cavablandırarkən deyib.

Erməni Baş nazir ehtiyac yaranarsa, dəyişiklik haqda qərar veriləcəyini qeyd edib. O əmin edib ki, bunun indiki sülh prosesi ilə heç bir əlaqəsi yoxdur, baxmayaraq ki, strateji baxımdan təsir göstərə bilər.

“Mən həmçinin bildirmişdim ki, əgər ratifikasiya prosesi gedişatında Konstitusiya Məhkəməmiz Azərbaycanla indi paraflanmış və sonradan imzalanacağı halda sülh sazişinin Konstitusiyaya zidd olduğu barədə qərar çıxararsa, mən özüm Konstitusiyaya dəyişikliklərlə bağlı təşəbbüs göstərəcəyəm. İndi bu barədə düşünməyə ehtiyac yoxdur”, – deyə N.Paşinyan qeyd edib.

Nikol Paşinyan vurğulayıb ki, Ermənistan hökuməti 2026-cı il dövlət büdcəsində müdafiə xərclərinin əhəmiyyətli dərəcədə artırılmasını planlaşdırmır. Onun sözlərinə görə, bu, məntiqli addımdır.