İlham Əliyev Hacıqabulda suvarma qurğuları kompleksi ilə tanış olub
Aprelin 9-da Hacıqabula səfəri zamanı Prezident İlham Əliyev bir sıra açılışlarda iştirak edib.
Dövlət başçısı rayon ərazisində “Agro Dairy” MMC-yə məxsus 4200 hektar torpaq sahəsinə Kür çayından nasos stansiyası vasitəsilə suvarma suyunun çatdırılması üzrə suvarma qurğuları kompleksi ilə tanış olub.
Bu sistem Prezidentin imzaladığı müvafiq Sərəncamlar əsasında qurulub və əkin sahələrinin suvarma suyu ilə təminatının yaxşılaşdırılması, habelə əkin dövriyyəsinə əlavə torpaqların cəlb olunması işlərinin davam etdirilməsi və bu istiqamətdə yeni layihələrin hazırlanmasını nəzərdə tutur.
Görülən işlər çərçivəsində Hacıqabul rayonu ərazisində 2022-ci ildə 2555 hektar sahənin suvarılması təmin olunub. Layihənin gələn il 1225 hektar sahədə də həyata keçirilməsi nəzərdə tutulur.
“Bu nasosxana ümumilikdə 4200 hektar ərazini suvarma imkanına malikdir. Bu sahələrdə əsasən arpa, buğda, qarğıdalı, soya, yonca, çuğundur və günəbaxan kimi bitkilər becərilir.
Əvvəl qışlaq sahəsi olub. Dəmyə şəraitində 6 sentner məhsul götürüldüyü halda indi bəzi yerlərdən buğda üzrə 70 sentner, arpa üzrə isə 80 sentner məhsul əldə etmişik”, – aqronom Tacəddin Misirzadə söyləyib.
Qeyd edək ki, Hacıqabulda hələ SSRİ dövründən susuzluq problemi müşahidə olunub. Rayonun suvarma suyu ilə təminatına ciddi ehtiyac var idi. Hazırda bu problem aradan qaldırılır.
![icon](/images/loading.png)