Hikmət Hacıyev BBC-də sülh prosesindən danışdı | Mühüm detallar

“Ermənistan və Azərbaycan müsbət gündəmlə dünyanı təəccübləndirməyi, dünyanı heyrətləndirməyi bacarıb”.

Bu fikirləri Prezidentin köməkçisi Hikmət Hacıyev “BBC World”ə müsahibəsində deyib.

Bildirib ki, artıq hərbi qarşıdurma başa çatıb: “Azərbaycan öz suverenliyi və ərazi bütövlüyünü bərpa etdi, öz ərazilərinin 30 ildir davam edən hərbi işğalına son qoydu. Hələ 2020-ci ildə 44 günlük müharibə başa çatdıqdan sonra Ermənistanla sülh müqaviləsi imzalamağa hazır olduğumuzu bəyan etmişdik. Hazırda Ermənistanla Azərbaycan arasında birbaşa diplomatik danışıqlar aparılır”.

Prezidentin köməkçisi bildirib ki, son 3 ay Ermənistan-Azərbaycan münasibətləri iki ölkənin müstəqilliyi tarixində ən sakit və ən dinc dövrlərdən biri hesab oluna bilər.

“Müharibə yoxdur, vəhşiliklər yoxdur, qarşıdurma yoxdur və əsgərlər kazarmalarına qayıdıblar. Nisbi sülh təmin olunub, indi onu uzunmüddətli sülhə çevirməyin, o cümlədən sülh müqaviləsinin imzalanmağın vaxtıdır”, – deyə H.Hacıyev qeyd edib.

Əlavə edib ki, Azərbaycan regionda sülh gündəmini dəstəkləyir. Prezidentin köməkçisi Ermənistanın 30 ildən artıq dövrdə işğalçı ölkə olduğunu bir daha xatırladaraq azərbaycanlılara qarşı etnik təmizləmə apardığını, ərazilərimizi dağıtdığını vurulayıb. Azərbaycanın suveren ərazilərində separatçı quruma dəstək verdiyini qeyd edib.

“Azərbaycan separatçı qurumun mövcudluğuna və onun hərbi komponentlərinə son qoymağa məcbur idi”, – deyə Prezidentin köməkçisi Hikmət Hacıyev fikirlərini yekunlaşdırıb.